Հարկային խորհրդատվություն Հայաստանում

Հարկային խորհրդատվությունը որոշումների մասին է, ոչ թե փաստաթղթերի։ Հարկը ծնվում է այն պահին, երբ Դուք ընտրում եք գործարքի ձևը՝ ռեժիմը, պայմանագիրը, վճարման եղանակը։ Այդ պահից հետո հաշվապահը կարող է միայն ճիշտ արտացոլել արդեն կայացած որոշումը։ Ուստի ամենաէժան խորհրդատվությունը նախօրոք է լինում։

Ի՞նչ հարցերով են դիմում

Ո՞ր ռեժիմն ընտրել՝ ԱԱՀ, շրջանառության հարկ, թե միկրոձեռնարկատիրություն, և ի՞նչ է փոխվում սահմանը հատելուց հետո։ Ինչպե՞ս բաշխել շահույթը՝ աշխատավարձ, թե շահաբաժին, և ի՞նչ հարկ է դրանից ծնվում։ Ի՞նչ հետևանք ունի արտահանումը, ներմուծումը կամ արտերկրի հաճախորդի հետ պայմանագիրը։ Ի՞նչ է իրականում ցույց տալիս ՊԵԿ անձնական էջի պարտքը և արդյոք այն ճիշտ է։

Ինչպես է անցնում խորհրդատվությունը

Դուք ուղարկում եք հարցը և թվերը, մենք վերադարձնում ենք գրավոր պատասխան՝ օրենսգրքի հոդվածների հղումներով, մեկ աշխատանքային օրում։ Գրավոր, որովհետև հարկային պատասխանը պետք է լինի ստուգելի՝ և՛ Ձեզ համար այսօր, և՛ ստուգման ժամանակ մեկ տարի անց։ Եթե հարցը մեկ պատասխանով չի փակվում, ասում ենք դա անմիջապես, ոչ թե երրորդ նամակից հետո։

Ռեժիմի ընտրության ժամկետները

Գործող բիզնեսը ռեժիմի մասին դիմումը ներկայացնում է մինչև փետրվարի 20-ը (հոդված 254, մաս 1, կետ 1 և հոդված 267, մաս 1, կետ 1)։ Նոր գրանցվածը՝ գրանցումից հետո 20 օրվա ընթացքում (հոդված 254, մաս 1, կետ 2 և հոդված 267, մաս 1, կետ 2)։ Այս 20 օրը ամենից հաճախ բաց թողնված ժամկետն է․ բաց թողնելու դեպքում բիզնեսը մնում է ընդհանուր ռեժիմում՝ ԱԱՀ-ով և շահութահարկով, մինչև հաջորդ տարվա փետրվար։

Ե՞րբ արժե հարցնել նախապես

Մինչև արտերկրի պատվիրատուի հետ պայմանագիր ստորագրելը։ Մինչև ԱԱՀ-ի շեմին մոտենալը՝ որպեսզի անցումը պլանավորված լինի, ոչ թե հայտնաբերված։ Մինչև շահաբաժին բաշխելը։ Մինչև առաջին աշխատակցին վերցնելը։ Մինչև ընկերության անունով գույք ձեռք բերելը։ Այս հինգ պահերից յուրաքանչյուրը փոխում է հարկը, և յուրաքանչյուրից հետո ուղղելը թանկ է կամ անհնար։

Ի՞նչ չենք անում

Չենք առաջարկում «օպտիմալացման» սխեմաներ, որոնք աշխատում են մինչև առաջին ստուգումը։ Եթե միակ խնայողությունը ռիսկային է, ասում ենք դա ուղիղ և ցույց ենք տալիս գինը՝ տույժը, տուգանքը և հետևանքը։

Ստուգումների ուղեկցում

Մեր ներկայացրած հաշվետվության վերաբերյալ ՊԵԿ-ի հարցին պատասխանում ենք մենք՝ ներառված է բոլոր սակագներում։ Ամբողջական ստուգման ուղեկցումը՝ նշանակված ստուգում և ներկայացուցչություն ՊԵԿ-ում, ներառված է, եթե Ձեր ամսավճարը 100 000 ֏ կամ ավելի է, մնացած դեպքերում՝ առանձին ծառայություն է։

Որքա՞ն է արժենում

Առանձին խորհրդատվությունը՝ 20 000 ֏ առաջադրանքի համար՝ գրավոր պատասխանով։ Սպասարկման պայմանագիր ունեցողների ընթացիկ հարցերն արդեն ներառված են ամսավճարի մեջ։ Ծանոթության առաջին հանդիպումը գրասենյակում՝ անվճար։ Եկեք հարցով, և մենք կասենք՝ դա կարճ պատասխան է, թե առանձին աշխատանք։